နိုင်ငံတော်သမ္မတရုံး အမိန့်ကြော်ငြာစာ အမှတ်၊ ၇၅ /၂၀၁၇

Printer-friendly versionSend by email

ပြည်ထောင်စုသမ္မတမြန်မာနိုင်ငံတော်

နိုင်ငံတော်သမ္မတရုံး

အမိန့်ကြော်ငြာစာ

အမှတ်၊ ၇၅ /၂၀၁၇

၁၃၇၉ ခုနှစ်၊ တော်သလင်းလပြည့်ကျော် ၇ ရက်

( ၂၀၁၇ ခုနှစ်၊စက်တင်ဘာလ ၁၂ ရက် )



ရခိုင်ပြည်နယ်ဆိုင်ရာအကြံပြုချက်များအပေါ် အကောင်အထည်ဖော်ဆောင်ရွက်ရေးကော်မတီဖွဲ့စည်းခြင်း



၁။      မောင်တောဒေသ စုံစမ်းစစ်ဆေးရေးကော်မရှင်၏ အစီရင်ခံစာနှင့် ရခိုင်ပြည်နယ် ဆိုင်ရာအကြံပေးကော်မရှင်တို့၏အပြီးသတ်အစီရင်ခံစာပါအကြံပြုချက်များကိုအကောင်အထည် ဖော်ဆောင်ရွက်နိုင်ရန်အတွက်“ရခိုင်ပြည်နယ်ဆိုင်ရာအကြံပြုချက်များအပေါ်အကောင်အထည် ဖော်ဆောင်ရွက်ရေးကော်မတီ”ကို အောက်ပါပုဂ္ဂိုလ်များဖြင့် ဖွဲ့စည်းလိုက်သည်-

          (က)   ပြည်ထောင်စုဝန်ကြီး                                                              ဥက္ကဋ္ဌ

                   လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေး

                   ဝန်ကြီးဌာန

          (ခ)    ဝန်ကြီးချုပ်                                                                          ပူးတွဲဥက္ကဋ္ဌ

                   ရခိုင်ပြည်နယ်အစိုးရအဖွဲ့

          (ဂ)    ဒုတိယဝန်ကြီး                                                                       ဒုတိယဥက္ကဋ္ဌ

                   နိုင်ငံတော်အတိုင်ပင်ခံရုံးဝန်ကြီးဌာန

          (ဃ)   အမြဲတမ်းအတွင်းဝန်                                                              အဖွဲ့ဝင်

                   ပြည်ထဲရေးဝန်ကြီးဌာန

          (င)    အမြဲတမ်းအတွင်းဝန်                                                              အဖွဲ့ဝင်

                   ပြန်ကြားရေးဝန်ကြီးဌာန

          (စ)    အမြဲတမ်းအတွင်းဝန်                                                              အဖွဲ့ဝင်

                   သာသနာရေးနှင့် ယဉ်ကျေးမှုဝန်ကြီးဌာန

          (ဆ)   အမြဲတမ်းအတွင်းဝန်                                                              အဖွဲ့ဝင်

                    စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန

          (ဇ)     အမြဲတမ်းအတွင်းဝန်                                                              အဖွဲ့ဝင်                    

                   ပို့ဆောင်ရေးနှင့်ဆက်သွယ်ရေးဝန်ကြီးဌာန

          (ဈ)    အမြဲတမ်းအတွင်းဝန်                                                              အဖွဲ့ဝင်                     

                  အလုပ်သမား၊လူဝင်မှုကြီးကြပ်ရေးနှင့်ပြည်သူ့အင်အား

                   ဝန်ကြီးဌာန

          (ည)   အမြဲတမ်းအတွင်းဝန်                                                              အဖွဲ့ဝင်

                   ပညာရေးဝန်ကြီးဌာန

          (ဋ)    အမြဲတမ်းအတွင်းဝန်                                                              အဖွဲ့ဝင်                     

                  ကျန်းမာရေးနှင့်အားကစားဝန်ကြီးဌာန

          (ဌ)    အမြဲတမ်းအတွင်းဝန်                                                              အဖွဲ့ဝင်                     

                  ဆောက်လုပ်ရေးဝန်ကြီးဌာန

          (ဍ)     ခေတ္တညွှန်ကြားရေးမှူးချုပ်                                               အဖွဲ့ဝင်

                   နိုင်ငံတော်သမ္မတရုံး

          (ဎ)    ဒုတိယဝန်ကြီး                                                                      အတွင်းရေးမှူး

                   နယ်စပ်ရေးရာဝန်ကြီးဌာန

          (ဏ)  အမြဲတမ်းအတွင်းဝန်                                                               တွဲဖက်အတွင်းရေးမှူး

                   လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေး

                   ဝန်ကြီးဌာန

၂။ ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ဆောင်ရွက်ရေး ကော်မတီ၏ လုပ်ငန်းတာဝန်များမှာ အောက်ပါအတိုင်းဖြစ်ပါသည်-

          (က)   မောင်တောဒေသ စုံစမ်းစစ်ဆေးရေးကော်မရှင်နှင့် ရခိုင်ပြည်နယ်ဆိုင်ရာ အကြံပေးကော်မရှင်တို့၏ အကြံပြုချက်များနှင့် စပ်လျဉ်း၍ မြေပြင် အခြေအနေ ပေါ်မူတည်ပြီး                အကျိုးရှိမည့်ကိစ္စရပ်များကို ထိရောက်စွာ အကောင်အထည်ဖော် ဆောင်ရွက်ရမည်။

          (ခ)    တရားဥပဒေစိုးမိုးရေး၊ တည်ငြိမ်အေးချမ်းရေးနှင့် မတူကွဲပြားသည့် လူမှု အသိုက်အဝန်းများအကြား စိတ်အေးချမ်းသာစွာ အတူတကွ နေထိုင်နိုင်ရေး တို့အတွက် ဦးတည်ကြိုးပမ်းဆောင်ရွက်ရမည်။

          (ဂ)    ရခိုင်ပြည်နယ်အတွင်းလုံခြုံရေး၊ စီးပွားရေး၊ လူမှုရေးဆိုင်ရာ ကိစ္စရပ်များ အလျင်အမြန် ဖွံ့ဖြိုးလာစေရေးအတွက် မဟာဗျူဟာစီမံချက် ရေးဆွဲ ချမှတ်ပြီး ဆောင်ရွက်ရမည်။

          (ဃ)   တိုင်းရင်းသား ကျေးရွာများ ရေရှည်ရပ်တည်နိုင်ရေးနှင့် IDP စခန်းများ ပိတ်သိမ်းရေးတို့အတွက် ကြိုးပမ်းဆောင်ရွက်ရမည်။

          (င)    ဒေသခံပြည်သူများသည် အခြားဒေသများသို့ ရွှေ့ပြောင်း ထွက်ခွာသွားခြင်းကို ကာကွယ်တားဆီးနိုင်ရန်အတွက် အခြေခံအဆောက်အအုံများ ပေါ်ထွန်းလာ စေရေးနှင့် အလုပ်အကိုင် အခွင့်အလမ်းများ တိုးတက် ရရှိလာစေရေး သင့်လျော် သည့် မူဝါဒများချမှတ် ဆောင်ရွက်ရမည်။

          (စ)    အကြမ်းဖက်တိုက်ခိုက်မှုပပျောက်ရေးနှင့် မူးယစ်ဆေးဝါး ကင်းစင်ရေး နယ်မြေ ဖြစ်လာစေရန် ဦးစားပေးဆောင်ရွက်ရမည်။

          (ဆ)   ပြည်တွင်း/ပြည်ပအဖွဲ့အစည်းများမှပေးအပ်သည့် လူသားချင်းစာနာထောက်ထား မှုဆိုင်ရာ အကူအညီများ၊ ထောက်ပံ့ပစ္စည်းများကို နိုင်ငံတော်က ချမှတ်ပေး သောမူဝါဒနှင့်အညီ ခွဲဝေပေးရေးကြီးကြပ်ရမည်။

          (ဇ)     ၁၉၈၂ ခုနှစ် မြန်မာနိုင်ငံသားဥပဒေအရ နိုင်ငံသားအဖြစ် အသိအမှတ်ပြုသင့် သူများကို အသိအမှတ်ပြု၍ နိုင်ငံသားအခွင့်အရေး ရရှိစေရေး (National Verification Process) ကို အရှိန်အဟုန်ဖြင့် အမြန်ဆုံး ဆောင်ရွက်ပေး ရမည်။

          (ဈ) ရခိုင်ပြည်နယ်အတွင်းရှိ လူမှုအဖွဲ့အစည်းများအား ၎င်းတို့၏ကိုးကွယ်သည့် ဘာသာ၊လူမျိုးနှင့်နိုင်ငံသား၊ ကျား/မဆိုင်ရာ ဖြစ်တည်မှုတို့အပေါ်အခြေခံ၍ ခွဲခြားမှုမပြုဘဲ တူညီသော ပညာသင်ကြားခွင့်ရရှိရေးနှင့် ကျန်းမာရေး စောင့်ရှောက်မှုပေးသည့် လုပ်ငန်းများ တိုးမြှင့်နိုင်ရေးတို့ကို စီမံဆောင်ရွက် ပေးရမည်။

 

          (ည)   ကော်မတီ၏ အကောင်အထည်ဖော်မှု အခြေအနေများအပေါ် တိုးတက်မှု အစီရင်ခံစာကို ပြည်သူများသို့ လေးလတစ်ကြိမ် ထုတ်ပြန်တင်ပြရမည်။

၃။ ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ဆောင်ရွက်ရေး ကော်မတီရုံးကို သီးခြားဖွင့်လှစ်ထားရှိရမည်။ ကော်မတီ၏ကုန်ကျစရိတ်အဝဝကို နိုင်ငံတော် သမ္မတရုံး၏ ရန်ပုံငွေမှ ကျခံသုံးစွဲရမည်။

၄။ ကော်မတီ၏ လုပ်ငန်းတာဝန်များ ထမ်းဆောင်စဉ် လိုအပ်သော လုံခြုံရေးနှင့် အုပ်ချုပ်ရေး ဆိုင်ရာ ကိစ္စရပ်များကို နိုင်ငံတော်သမ္မတရုံးနှင့် ရခိုင်ပြည်နယ် အစိုးရအဖွဲ့တို့က ဖြည့်ဆည်း ဆောင်ရွက်ပေးရမည်။

၅။ ရခိုင်ပြည်နယ်ဆိုင်ရာကော်မရှင်များ၏ အကြံပြုချက်များနှင့်စပ်လျဉ်း၍ အကောင် အထည်ဖော် ဆောင်ရွက်ရာတွင် မြေပြင်အခြေအနေပေါ် မူတည်၍ အကျိုးရှိစွာ ထိထိရောက်ရောက် ဖော်ဆောင်နိုင်ရေးအတွက် လိုအပ်သည့် အကြံဉာဏ်များ ရယူနိုင်ရန် အကြံပေးအဖွဲ့ကို ပြည်တွင်းပြည်ပမှ ပညာရှင်များ၊ ဘာသာရပ်ဆိုင်ရာ ကျွမ်းကျင်သူများ၊ အတွေ့အကြုံရှိသူများနှင့် ဖွဲ့စည်းသွားမည်ဖြစ်ပြီး ဖွဲ့စည်းသည့်အမိန့်အား သီးခြားထုတ်ပြန် သွားမည်ဖြစ်သည်။

(ပုံ) ထင်ကျော်

နိုင်ငံတော်သမ္မတ

ပြည်ထောင်စုသမ္မတမြန်မာနိုင်ငံတော်